澳門勁歎之旅 (上集) - Day 2 (大利來餐廳、大賽車+萄萄酒博物館 & 法蘭度餐廳)

日期：2011 年 5 月 30 日 (晴天)

今早 9 點鐘起身梳洗，然後落去 Banyan Cafe 食早餐 Buffet。落到去職員話暫時 full 左，問我地會唔會去 1 樓食 (所有食物都相同)，最終我地決定等一陣，因為只有今次先有機會入去 Cafe 食早餐 (下次免費入住係唔包早餐的)。於是職員叫我地係 Cafe 出面嘅 lounge 坐一陣，一邊歎住果汁同麵包慢慢等。

Lounge 嘅麵包同果汁都有好多選擇，唔知 buffet 會唔會有更多款式呢？

Lounge 都好寛敞好舒服，喺等待期間走左去 reception 問可否 2 點鐘 late check-out，最終成功左，可以喺房歎多陣！Yeah！

等左大約 10 分鐘就有位喇，我地嘅早餐時間開始喇。

果然 Cafe 嘅麵包比 Lounge 的更豐富。

早餐 buffet 一定有沙律吧，仲有我至愛嘅煙三文魚潻，好開心呀！


熱葷雖然選擇多，但味道同質素就爭咁 d，有 d 失望。

不得不讚是酒店嘅鮮果汁，好鮮甜，好好飲！

除左果汁外，仲有香檳選擇，真係比較少見！

我地都唔執輸乾番杯先！Cheer！

食飽後再番房 hea 吓浸吓浴，話咁快又到 check-out 時間，真係好唔捨得離開呀！

一邊飲住白酒，一邊浸吓個悅心池真係       星級享受！

終於要 check-out 喇，放左行李喺 reception 後就去官也街嘅大利來餐廳食馳名的豬扒包！


大利來是大排檔式經營的，所以沒有冷氣，不過最緊要係好食。

一坐低，諗都唔諗就叫左兩個豬扒包同兩支可樂，我同老公仔一人一份 !

只可惜豬扒包令人非常失望，首先個包一 d 都唔脆，而且豬扒味道一般，真係名大過實，唔會再幫襯囉！ 

之後就搭巴士去新口岸附近的大賽車博物館同葡萄酒博物館參觀吓。

博物館內除了賽車外，還展出多部古董老爺車。

澳門每年都舉辦格蘭披治一級方程式賽車大賽，當然唔少得展出多部賽車啦！

跟住再參觀隔離的葡萄酒博物館，了解葡萄酒的釀製文化同發展。

其實葡萄酒博物館無咩特別，如果要俾錢入場一定唔會去。

參觀完博物館，便行去新葡京附近嘅巴士站搭 26A 巴士去黑沙灣食出名嘅葡國菜 - 法蘭度餐廳。喺等車期間，順便影吓附近嘅酒店，唔知幾時可以住曬咁多間酒店呢？


永利酒店在太陽的照耀下十分搶眼。

左邊係星際酒店，而右邊就係美高梅酒店。

新舊葡京對比下真係爭好遠喎！

終於等到 26A 巴士喇，我地足足搭左差不多 45 分鐘先到達黑沙灣，喺澳門要搭 45 分鐘車程都係第一次，可想而知黑沙灣都真係幾遠。


咁遠嚟到梗係要同黑沙灣影張相啦，大家見唔見到近海邊 d 沙真係黑色呀！
 
法蘭度雖然門面唔係好突出，不過餐廳就喺海灘隔離，所以好容易找到。聽講呢間餐廳成日好多人排隊，由於我地要趕住搭船番香港，所以好早去唔駛排隊。


法蘭度有三個特式，第一係全年 365 日無冷氣、第二係無茄汁供應 (但大部份菜式都跟薯條)、而第三就係無飲用水供應。雖然係咁，但餐廳每日都好多人幫襯，真係串得起！

豬仔飽又大個又脆，最重要係唔駛錢，免費的。

我地只係叫左葡式乳豬、鹽燒沙甸魚同 2 枝葡國啤酒，乳豬皮脆肉嫰好好食 (唔怪得咁多人慕名而來啦)。而鹽燒沙甸魚鹹味適中，都算唔錯。

食飽飽後就搭番 26A 去 Banyan Tree 攞番行李，之後再搭 shuttle bus 去氹仔碼頭搭船番香港喇。






我地要行過去威尼斯人酒店嗰邊先可以影到 Galaxy 酒店的全景，雖然遠左少少，不過真係好靚。
話咁快 2 日澳門之旅就咁 hea 完，期待下一次嘅來臨！Bye Bye！