澳門勁歎之旅 (上集) - Day 1 (Banyan Tree、誠昌飯店、三元粥品、明記牛雜 & 勤記糖水)

日期：2011 年 5 月 29 日 (晴天)

自從上次住過布吉 Banyan Tree，歎過       級享受後，我地已經成為佢嘅 Fans 喇。悉馮澳門 Banyan Tree 今年 5 月正式開幕，再加上買一送一嘅優惠，我地當然唔會放過依個機會啦，最終上網 book 左一晚高級路氹套房 (Grand Cotai Suite - King Bed)，原本價值 MOP2,499 一晚 (這是星期日 - 四的房價，加稅後約為 MOP 2,900)，但因為買一送一優惠，以家每晚只需 MOP1,450 真係好抵。

今天我地大約中午 12:00 到達氹仔碼頭，然後再搭 Galaxy 嘅 shuttle bus 去酒店，原來 Galaxy Macau Resort Hotel 是由三間酒店組成，分別為 Galaxy、Banyan Tree 同 Okura Hotel (日本大倉酒店)。唔駛 5 分鐘就由碼頭到達酒店，一入酒店大堂剛好是「運財銀鑽」表演，我地睇埋個表演先搵 Banyan Tree 入口。

酒店大堂以孔雀作主題，每 15 分鐘會有「運財銀鑽」表演，但係粒鑽石喺邊呢？

表演開始喇，水池會隨著音樂變色同上下擺動。

終於見到超巨型嘅鑽石慢慢升起喇，真係大到好誇張呀！

睇完表演喺時候要 check-in 喇，Banyan Tree 嘅入口一 d 都唔起眼，我地問左幾個職員先搵到。

Banyan Tree 入口位於商店之間，所以都幾難搵。

我地入到 Banyan Tree 嘅 reception 見到好多人排隊 check-out，諗住好快會有房啦，點之職員話要下午 3:00 先可以 check-in，唯有去食個 lunch 先啦。Galaxy Resort 另一好處係非常近官也街，由 Banyan Tree 大門直出再過條馬路就到，真係非常方便。

過左馬路後，抬頭回望 Galaxy Resort，真的好 Grand，好金碧輝皇呀！


既然嚟到官也街就試吓誠昌飯店馳名嘅水蟹粥，一去到門口已經好多人排隊，大約等左 10 分鐘就有位喇。我地一坐低無耐已決定好食 d 咩，因為佢款式唔算好多，而且我地揀曬佢 d 招牌菜。

門口都已經貼曬有 d 咩招牌菜，可以喺等位時諗定食咩。

我地叫左水蟹粥同椒鹽田雞，水蟹粥好鮮甜，而田雞好大隻，淡淡肉，好好味！

佢嘅另一招牌菜 - 酥炸墨魚丸都好好味，啱啱炸起又夠熱又彈牙！


醫飽肚後便行番酒店 check-in，但職員話房間仲未 ready，真係要等到 3 點鐘才可 check-in，於是我地喺酒店大堂等等等等等 ......

等房期間影吓 Banyan Tree 嘅 reception，快 d 有房啦！

終於到左 3 點鐘喇，第一時間走去 reception 問有房未，好開心終於有房喇，即刻搭 lift 去 18 樓。

一出 lift 就聞到走廊好香嘅檸檬香薰味，好舒服。

我地今次入住 1807 號房，事不而遲，快 d 入去先！

嘩！高級路氹房已經係 Banyan Tree 最平嘅級別，但房間面積都有 100 平方米，仲大過威尼斯人客房。

房內 Mini Bar 的雪櫃都 ok 凍，而且仲有酒杯，一陣間要去超市買白酒同汽水雪凍佢，今晚慢慢歎。

房內客廳的梳化好舒服，攤喺到睇電視係一流嘅享受！

房間最大特式就係依個悅心池，水池長達 4 米，亦有自動調校水溫功能。窗簾是電動的，只可惜窗口對住爛地，大殺風景。

好掛住 Banyan Tree 張床，今晚又可以再重溫超舒服超柔軟嘅感覺喇！

房內除有花灑玻璃門外，仲有木桶可以浸浴。個木涌超大之餘更設有雙座位，今晚可以同老公仔一齊浸浴，sweet 吓先！

不得不提依個廁所，廁所板除左電動外，坐落去仲暖暖地，冬天去廁所一定好舒服。此外，房間內還可點香薰，不過無走廊嗰 d 咁香。

參觀完房間後，趁太陽伯伯仲無收工，快 d 換衫落去人造沙灘同衝浪泳池先。大家記住唔駛帶浴巾架，因為泳池有供應的。

由於沙灘供 3 間酒店住客享用，所以好多人，好難先搵到一張沙灘椅。

這個衝浪池好淺水，不時見到人造浪衝向池邊，真係好似喺海灘游水。

跟住我地去左 Banyan Tree 專用的泳池，這是酒店的沙灘椅，如果想曬太陽可以將白色帳篷拉低，非常方便。

喺人造沙灘逗留一陣後，我地決定番房歎吓私家悅心池仲好。歎吓，hea 吓嘅時間真係過得好快，又係時候出動去新馬路搵野食。

Galaxy 另一個好處係有 shuttle bus 到達多個地方，如碼頭、關閘、威利尼人酒店、星際酒店及新馬路等等。

晚上的 Galaxy Resort 散發著高貴脫俗嘅氣派。

新馬路站係最多人排隊的，每隔 10 - 15 分鐘就有一班，只可惜每次都係架 16 座旅遊巴，應該搵架大旅遊巴梳通吓人潮！

上車後，唔駛 10 分鐘就到達新馬路，我地首先去幫襯三元粥店食肉丸粥。

因為旅遊書同阿蘇都有介紹過三元粥店，所以我地決定入去試吓。

坐低後睇吓個餐牌，發覺依度啲粥都唔平，平均要成廿幾蚊一碗。

我叫左手打牛肉丸粥，而老公仔就叫左手打豬肉丸粥，可以交換食試吓。

肉丸都算幾大粒，咬落有口感同好有肉味，而豬肉丸較鮮甜，好好味！

食完肉丸粥，就嚟依擋好出名嘅明記牛什試吓。嚟過幾次澳門都係第一次幫襯，見到幾多人排隊，我地都唔執輸湧上去買喇。

依擋牛什經常都大排長龍，今晚可能係星期日所以少 d 人。

我諗老闆每晚剪牛什都剪到手軟！

牛什又濃又惹味，雖然成盒牛什連一串牛栢葉要成 $50 真係幾貴，但係就好好食，所以下次都會再幫襯！

食完牛什都已經飽喇，跟住去左十六蒲賭番兩手，最終無輸無贏，然後再行去勤記食雞蛋腐竹糖水。

再次幫襯都好好味，當晚仲有好多人專登揸車去買外賣潻。

食完糖水後就搭巴士番港澳碼頭，再轉搭 Galaxy shuttle bus 番酒店。

Banyan Tree 其實係大倉酒店隔離，晚上酒店外觀都好 Grand 好靚！

番到房立即校水浸浴，今晚就浸泡泡浴啦！

浸完泡泡浴皮膚滑啫啫，再瞓落 Banyan Tree 超舒服嘅床上，真係好快就進入夢鄉，早抖喇！