四圍走的足跡: 澳門佛山美食之旅 2010 (Day 2

日期：2010 年 11 月 13 日 (晴天)

由於今次威尼斯人酒店無包早餐，我地 9 點鐘就 check out 搭 shuttle bus 去拱北關閘。喺關閘附近飲過早茶後，便過關去珠海搭長途旅遊巴去佛山喇！

臨到達佛山時，沿途經常見到多個魚塘，別有一番風味！

大約下午 2 點終於到達佛山市中心 (全程為 3 小時)，落車後第一時間去佛山禪城酒店 check in 放低行李，然後再去搵野食。只可惜搵左好多間餐館都已關門，幾經辛苦先搵到一間中西式快餐店仲繼續營業，喺無得選擇嘅情況下就衝左入去，好彩 d 餸菜都幾好食。

這碟羊肉都好野味 (已經唔記得個名喇)！

這個梅子豬手酸酸地都幾開胃！

醫飽肚後，就立刻步行 5 分鐘去參觀第一個景點 - 佛山祖廟。佛山祖廟原名為北帝廟，興建於北宋年間，已有九百多年的歷史價值。後來因其歷史久遠，又是佛山各廟之首，故又名為祖廟。

佛山祖廟已成為遊彿山必去的景點！

當日有好多善信到祖廟拜神祈福！

佛山貴為武術之都，當然培育不少武術奇材及一代宗師，當中有為人所熟悉嘅黃飛鴻、將詠春發揚光大嘅葉問、把中國功夫宣揚海外嘅李小龍等等都係出自佛山，以家等我地去參觀下葉問堂先。

堂內除了擺放葉問的銅鑄人像外，還有其他陳年照片，當中梗係唔少得其第子李小龍啦！

如今終於見到甄子丹釋演葉問時練功嘅木人樁喇！

葉問堂則有《香港葉問宗師詠春拳系展》展示詠春在香港的發展情況。

除了葉問堂外，祖廟內還有佛山黃飛鴻紀念館，館內展示了黃飛鴻銅鑄人像、其生平、功夫簡介及以黃飛鴻為題的電影等等。

第一副相是黃飛鴻真人銅像，而第二副則是他的 Q 版銅像，如果唔係有「仁者無敵」這四個字都好難想像係黃飛鴻！

以家先第一次見到黃飛鴻的樣貌，真係失敬失敬！

館內展示了黃飛鴻的功夫，當中有虎鶴雙形拳、鐵線拳等等。

館內還設有迷你版的「寶芝林」，內裏展示當年嘅真實狀況。

館前則設有醒獅表演場，只可惜我地錯過左下午 3 點嘅表演。

參觀完祖廟後，我地就喺祖廟路巴士站搭 137 號公車去千燈湖公園欣賞佛山嘅秋色彩燈。佛山秋色是由明代流傳下來的民間習俗，人們為了慶祝秋收季節，利用農業及手工業剩餘的物資製成如彩燈等精美的工藝品。此外，還有其他表演節目如舞獅、舞龍、藝術表演等來慶祝豐收，盡顯佛山秋色的獨特文化。