澳門佛山美食之旅 2010 (Day 1 - 澳門篇)

日期：2010 年 11 月 12 日 (晴天)

由於威尼斯人酒店慶祝  3 周年紀念，可以優惠價 $1,168 入住皇室套房。但因反應熱烈，我地只 book 到星期五的房間，唯有番公司攞一日假順便去埋佛山玩吓！Lucky 嘅我們仲剛考遇着都市日報的巨龍澳門船飛抽獎，最終抽到一張標準客位船飛 (價值 $134)。原本我地買了一張實惠客位船飛 (價值 $88) 分開坐，但後來職員搞錯編左我地兩個都坐實惠客位，於是一經查詢後便可 upgrade 一齊坐標準客位，真係非常 lucky！

巨龍嗰然冇改錯名，裏面可容納 1152 名乘客，但速度就冇噴射飛船咁快，大約需 1 小時 15 分鐘才到達氹仔碼頭，上船後瞓個覺就到喇！

大約下午 1 點鐘就到達氹仔碼頭，一出碼頭就見到威尼斯人酒店嘅 shuttle bus 就立即上車向酒店出發。一入酒店嘅第一個感覺就係好「金」呀，無論大堂的裝飾佈置，以至我地間皇室套房都係金碧輝皇，好有氣派！唔信？ 睇吓 d 相你就知喇！

酒店大堂的裝飾！

酒店大堂天花板的壁畫！

以下是我地間皇室套房嘅相片：

張床都好舒服，拍得往上次布吉 Banyan Tree 嗰張！

張床過小小就有個客廳仔，有條 2 級仔嘅樓梯分隔住！

放低行李便搭的士搵野食，我地揀左海島船食萄國菜。去到餐廳已經 2 點幾喇，餐廳只得一兩枱客，坐低後就即刻叫野食，因為餐廳 3 點後就落場，唔好左住人收工嘛！

食葡國菜當然要飲番葡國啤酒先啱 key 喇！

首先出場嘅係馬介休球，雖然淡口左 D，但啱啱炸起都好好食！

估唔到最好食竟然係依碟好清甜嘅炒雜菜！

當然唔少得葡式乳豬啦，但大家睇相都見到 D 皮又燶又硬，一份乳豬成 $200 幾蚊，又貴又唔好食，真係非常失望！

食飽後就到附近超市買啤酒薯片，然後再搭的士番酒店 hea 吓。首先就到賭場碰碰運氣，但係最終輸左 $500！

後來聽人講唔好喺自己住嗰間酒店賭錢，唔知係唔係真呢？

賭完錢後再行吓酒店的大運河購物區，感受一吓威尼斯嘅氣氛！

剛巧有旅客坐貢多拉遊運河，船夫還會一邊划船一邊唱歌！

行到攰又番房 hea 吓歎吓啤酒，大約晚上 8 點就搭的士去峰景餐廳試吓馳名膏蟹粥。

膏蟹粥嗰然名不虛傳，整碢粥有好多蟹膏，粥底夠綿亦散發著濃烈嘅蟹膏味！而另外嗰碟炸米通魚球又香又脆，難怪老公仔話下次嚟澳門要再幫襯！

不過蝦球煲就麻麻地喇！

食完碢粥後真係好飽，跟住就搭巴士去官也街買鉅記手信。

買完手信後就由官也街行去十六浦嗰邊諗住幫襯細龜炒河，但行左好耐都搵唔到，仲以為自己行過龍，點知原來細龜已經無做囉，唯有幫襯對面嘅六記食竹昇打麵。

我地叫左蝦子撈麵同雲吞麵，但係 D 麵唔夠彈牙，已經食唔番兒時嘅感覺喇！

食完六記諗住番搭車番酒店，但途經見到一間糖水大排檔，老公仔話認得係阿蘇介紹過，於是又忍唔住一人叫左一碗雞蛋腐竹糖水。

因為腐竹完全溶入糖水中，所以糖水又滑又有好濃嘅腐竹味，好好味！下次嚟澳門除左要再幫襯峰景餐廳外，當然唔少得勤記糖水啦！Yeah！

食完糖水之後真係要番酒店，因為已經飽到上心口喇！明天見，BYE BYE！