2009 布吉自由行 - Day 4 (Day Tour - PP Island + Egg Island & 99 Seafood)

日期：2009 年 4 月 23 日 (晴天)

今天又再出島去 PP Island & Egg Island，一早起床天氣風和日麗，又喺時候要感恩喇！今早食酒店早餐時偷偷地攞左 5 塊麵包準備一陣間餵魚 ，唔好話俾人知呀！ 食完早餐後，再到酒店大堂等旅遊巴接送，之後又再坐快艇出發喇，Yeah！

由於我地係最遲上船，所以要分開坐，不過咁就可以喺快艇到影相留念喇！

一上船導遊就有個壞消息宣佈，原本個 Tour 有去 Maya Beach，但導遊話今天海浪太急，快艇不能安全停泊在岸邊給我們上落，所以只好取消這個景點，雖然導遊嘅決定係啱(安全至上嘛)，但係都有 D 失望！  於是我們第一站就到 PP 細島嘅 Loh Samah 海灣游水濕吓身先！

老公仔已二話不說地由快艇跳落海游水喇！

我都有著救生衣落水架，但就唔可以好似老公仔咁 enjoy 喇！希望可以快 D 學識游水就好喇！

大約逗留左 45 分鐘後，就上船去另一個景點 Viking Cave 遠觀燕窩洞，據說這裏除了有數以千計的燕子巢穴外，還有漂亮的鐘乳石及描繪船隻的古代壁畫，曾吸引好多遊客參觀。但由於遊客源源不盡，對洞內原居民造成滋擾，所以現在只可在洞外遠觀！

參觀完燕窩洞後再去猴子灘，開頭導遊話因為潮漲有機會去唔到，好彩我地去到時快艇可以勉強停泊，但潮漲已差不多將整個沙灘淹沒了，猴子唯有走到海邊的石頭或爬到樹上避一避。當 D 猴子見到我地接近海灘時，聰明的牠們已經估到開飯時間到喇！

導遊派左船上的西瓜俾我地餵猴子 ，睇吓佢地食得幾津津樂道！

離開猴子灘後，我地再到 Pileh 海灣玩浮潛，這還有很多珊瑚礁同熱帶魚，望落去就似海底水族館。

D 海水實在太清喇，喺船上都隱約見到海底的珊瑚礁群！

你睇吓，真係有好多魚呀！



約一個小時後就離開 Pileh 海灣到 PP Don 大島食自助午餐，由於食飽後不適宜游水，所以我地只係到處影相，感受吓大自然嘅美景！


我估這是 PP 島上的渡假酒店，有機會一定要住番一晚！

在這裏一邊坐住吊椅，一邊欣賞雪白嘅沙灘同清澈嘅海水都唔錯架。

喺時候要上船到另一個島嶼 - Egg Island (蛋島) 喇！

原來 PP 島距離蛋島好遠架，我地大約坐左兩個鐘頭快艇先去到 (記住係快艇嘅速度)。落船後租左兩張沙灘椅就攞埋 5 塊麵包去餵魚喇！

嘩！你睇吓，喺好淺水嘅地方已經有極多熱帶魚喇！

當你擺塊麵包喺水面，D 熱帶魚就會從四方八面湧埋嚟！

最終 5 塊麵包都唔夠，我地係沙灘的小食檔買左一條麵包玩餐飽，而熱帶魚就食餐飽，一舉兩得，Yeah！

又係時候同蛋島講 Bye Bye 喇！

返到酒店休息一陣後，去左芭東海灘行吓，入夜後再到 99 Seafood 食海鮮，今晚會食泰式沙嗲串燒、咖哩蟹同超大隻嘅虎蝦！


沙嗲串燒有雞、牛同豬肉，D 沙嗲汁好香！

今晚再食咖哩蟹， 比起前幾日食嘅咖嘢粉蟹好味得多！

今晚嘅重頭戲終於出場喇，登登登登 ...... 超大嘅虎蝦

蝦身啖啖肉，又爽又彈牙，好好味！

食飽就番酒店，沿途仲見到有車輛在街上宣傳泰拳。