2009 布吉自由行 - Day 3 - Part 2 (Phuket Shooting Range , Karon View Point & Phuket Town)

日期：2009 年 4 月 22 日 (天晴但有幾陣驟雨)

食完 lunch 都已經 3:00pm 喇，所以急不及待叫 Mr. Chai 車我地去 Chalong 迴旋處的 Phuket Shooting Range，在這裏可以一次過揸 cart 仔、射槍同騎大象，慳番唔少時間。沿途見到個天開始灰灰地，好擔心會落雨，所以一開始就揸 cart 仔先。

臨出發去布吉前，老公仔已嚷住要揸 cart 仔，你睇吓佢以家幾開心，成個大細佬咁！

我考慮左好耐先肯落場，不過老公仔話我係全場最慢嗰個，無計啦，安全至上嘛。臨尾職員仲俾左支旗仔我影相，唔知係唔係頒個最慢獎俾我呢！

揸完 cart 仔就到 Phuket Shooting Range 玩真槍實彈，一入去就聽到砰、砰、砰嘅槍聲已經好震撼，因為咁大個女都未試過近距離聽槍聲。據稱這裡的教練都是退役警察，所以拿起真槍都似模似樣。這裏有多款手槍任君選擇，如 Short Gun、點二二或點三八等不同口徑手槍，當然每款手槍價格都唔同啦。

當你揀好手槍後，就跟住教練去到射擊的地方，而其他同行的親友要在 Waiting Area 內等候，以下 D 相都係托職員幫手影。教練會首先講解手槍的結構如入子彈的地方等，然後會教你揸搶的姿勢同開槍方法，之後就可以試射一至兩槍。當掌握技考後，就可以正式開始，每次有 10 粒子彈。首先當然係老公仔出場啦，今次揀左點三八口徑手槍。

記住要聽教練講解，最緊要記得帶耳塞和眼罩保護耳仔同靈魂之窗呀！

老公仔的成績表，準確度達 72%，勁呀！

終於到我喇，我同老公仔一樣揀左點三八口徑手槍！我覺得枝槍好重，而每一次開槍嘅後座力都好大，成枝槍頭飛起左！

我的成績表，準確度只達 44%，唔合格！

當我地射緊真槍時，忽然出面落好大雨，好彩先玩 cart 仔，如果唔係就變落湯雞喇！跟住老公仔要玩 Rifle 22 考吓眼界。

見到老公仔瞄準射擊，希望可以打到中間嗰點啦，加油！

嘩！成績唔錯喎，準確度有 89%！雖然我無份玩，但係都要影番張相紀念！

一於唔好停，繼續再玩散彈，試吓佢嘅威力有幾勁！

老公仔話打第一槍後隻手好痛，因為它的後座力非常勁！

成績都幾好架，準確度有 70% ，第一次就有咁嘅成績都算唔錯，抵錫！

射完真槍後再去騎大象，今次又係我嘅第一次，所以心情特別興奮。大象行的速度超慢，坐上象背上的椅子又高，當大象行斜路時，特別落斜真的很危險，一定要捉實椅柄，原來騎大象一 D 都唔過癮！

行到中途大象突然間停左唔行，原來佢要放大大，好臭呀！

背住我地行完一圈後，買番 D 菠蘿慰勞大象先！

離開 Phuket Shooting Range 後已經 5:30pm 有多喇，急急腳叫 Mr. Chai 車我地去 Karon View Point，希望可以係日落前欣賞布吉景色。Karon View Point 位於 Kata Beach 的山頂上，在這裏可望到 Kata Noi, Kata & Karon 三個沙灘的全景之餘仲有個無敵大海景，難怪成為遊客必到的景點。

好彩去到太陽伯伯仲未放工，可以一睹美麗的風景。

離開 Karon View Point 後，就出發去 Phuket Town 行吓 Big C 同 Central Festival Phuket。Big C 真係一間好大的超級市場，我地仲買左好多公仔麵做手信。而在 Central Festival Phuket 都有收獲，因為商場內的 Levis 牛仔褲有 7 折優惠，計起上嚟每條牛仔褲大約港幣 200 蚊左右，非常超值，所以我地兩個買左好多 Levis 番香港。

行完 2 個商場後就叫 Mr. Chai 車我地番酒店，話咁快 8 個鐘頭嘅租車已經夠鐘，不得不讚 Mr. Chai 的服務態度真係好好，如果下次去布吉一定會再 book 佢嘅 car service。

番到酒店放低今天的戰利品後，就到芭東夜市嘅 Papaya 食摩登泰菜，餐廳環境優雅而食物質素都 OK。食完 dinner 後再去番昨晚嘅酒吧啤啤佢，跟住就番酒店瞓覺準備明天的 Day Tour 喇，bye bye，聽日見啦！