2008 西安自由行 - Day 1 (鐘樓、鼓樓、安定門城牆 & 回民一條街)

日期：2008 年 11 月 29 日 (晴天)

繼「萬里長城」後，今年決定去西安欣賞秦始皇另一項被譽為世界第八大奇蹟嘅壯舉「秦始皇兵馬俑」。今早懷著興奮嘅心情乘搭港龍航空出發去西安，約於兩個小時多便到達西安咸陽國際機場。

落機攞完行李後，便搭機場巴士 1 號線直達西安市區鐘樓（美崙酒店門前），然後再搭的士去我地入住四晚嘅酒店 - 西安豪華美居人民大廈。辦理完 check-in 手續後，放低行李便立即喺附近搵間中菜館醫肚！

依碟羊肉用左陝西嘅調味料烹調，好野味！

食 D 咁野味嘅餸菜，當然唔少得飲西安嘅漢斯啤酒，啤啤佢啦！

醫飽肚後已經差唔多四點鐘喇，急急腳再搭的士參觀位於西安市中心嘅古蹟 - 鐘樓。西安鐘樓於明朝建城，主要用作報時及發佈消息，現已有 600 多年歷史價值，是中國古代保存得最完整及最大的一座鐘樓。

原來昔日樓上懸一口大鐘，每日擊鐘報時，故名鐘樓。

在鐘樓內可觀看表演節目，只可惜我地錯過了當日的表演時間，唯有影相留念啦！

遊客可俾錢試吓敲鐘嘅滋味，鐘聲都幾響亮架！

現在西安鐘樓位於市中心東南西北四條大街交匯處，十分暢旺。

參觀完西安鐘樓，就立即去埋斜對面嘅西安鼓樓。西安鼓樓位於鐘樓西面，比鐘樓還要早四年建成，換言之也有 600 多年歷史啦。鼓樓嘅東西兩側放置 4 個大鼓，而南北兩側則有 24 個以小篆書寫中國傳統二十四節氣嘅小鼓，場面好壯觀架！

如果大家一次過參觀西安鐘樓及鼓樓，記住買聯票 (RMB 40) 抵 D 架！

南側匾額上書「文武盛地」，而北側則有「聲聞於天」匾額。

據說古時白天先敲鐘，後擊鼓，再鐘鼓齊鳴；到夜晚就先擊鼓，後鳴鐘，再鼓鐘和聲，好有規律架！

大家估唔估到鼓面寫緊 d 咩節氣呢?  

參觀完鼓樓後就行吓市中心大街，西安市中心商店林立，街道經常人來人往，十分熱鬧。行吓行吓就到安定城牆，只可惜城牆已關門，唯有在外圍影住相先啦！





影完城牆都已經入夜喇，就逛吓西安著名的回民一條街，品嚐一下地道美食。回民一條街位於鼓樓北面，是回族人民的聚居地，街上有很回民經營嘅攤擋售賣回族飾物，在街道兩旁更有大量的美食店鋪售賣如串燒及泡漠等西安小吃。唔好講咁多喇，係時候開餐喇！Let's Go！

晚上的回民一條街人頭湧湧，十分熱鬧。

街上見到最多的就係串燒擋，串燒嘅香味佈滿整條街，未食已經溜口水喇！

我地隨便揀左一間可以坐底嘅食市，叫左一碗羊內泡漠、牛肉泡漠、一大扎羊肉、牛肉、羊肚同魷魚串燒，一次過試盡西安地道小食！Yeah！

西安最著名的羊肉泡漠，其實係將麵包撇碎放入羊肉湯內。不過，我覺得味道一般，不太啱我口味，感覺似食緊一大碗發漲嘅麵包！

一場黎到緊係要試吓西安另一特色小食 - 清真八寶藕粉鏡糕啦！

八寶藕粉鏡糕是用糯米 + 豆 + 紅枣造成的，賣相有 D 似香港嘅砵仔糕，但我覺得味道略為甜左少少。

食飽後，再逛吓回民一條街，仲買左 D 兵馬俑鎖匙扣做手信。之後影埋鼓樓同鐘樓夜景後，就搭的士番酒店瞓覺喇，事關聽日要一早起身去華山尋找令狐沖嘅踪跡呀！

 晚上嘅鼓樓金光閃閃，非常奪目！

我覺得晚上嘅鐘樓格外多份古典美！