2012年10月9日 星期二

2012 澳洲自駕遊 - Day 5 (Glenworth Valley & The Numbucca Motel)

日期:2012 年 6 月 20 日 (晴天)

今朝食過早餐便 check out 離開悉尼市中心到 Glenworth Valley 騎馬,之後就開始揸車北上黃金海岸。由於我地兩個之前沒有騎馬經驗,所以早前喺香港上網 book 左早上10 點的 2 hours Guided Rides (A$90.5 - A$80 tour + A$5.5 insurance + $5 hamlet)。由於 Glenworth Valley 距離悉尼市中心約一個鐘車程,所以我地 8:30 就開始出發去騎馬仔喇!

差唔多到達 Glenworth Valley 時要望望公路兩旁的指示牌 (指示牌不是十分起眼,真係要好留心先睇到),見到 Glenworth Valley 指示牌便沿住箭咀方向落山。但越落越唔對路,因為已經行左幾分鐘都仲係山路,好似去左荒生野嶺咁一架車都無,但明明見到指示牌話直落就到,於是繼續行先算。最後,差唔多到山腳時就見到 Glenworth Valley。

 

終於到左 Glenworth Valley,仲見到超多馬!

 

這裹的地方好大,能給馬兒有足夠的活動空間。 
 
 

但而家已經 10 點鐘喇,唔知 tour 開始左未呢? 好擔心!!!

落車後即刻走向 reception 登記,好彩 tour 仲未開始,而且還有其他團友未到。我們首先要填一張 form 記錄騎馬經驗 (當然係 0 啦),然後便獲發一頂頭盔,之後就要等職員安排一切。

 

唔知一陣間會騎邊隻馬呢? 如果老公仔騎白馬咪變成白馬王子囉!











足足等左半個鐘先可以入去馬場上馬,如果換轉喺香港已經俾人投訴左好耐,不過黎到外國要習慣吓喇!




老公仔今次的 partner 係 Sally,職員整理好馬鞍後就可以上馬!



而我今次嘅 partner 就係 Kelly! Hello! Kelly, 記住一陣間乖 d 呀! 



嘩! 上左馬後都似模似樣喎! 

 

其實上馬都唔係好難,首先左手握著馬匹的鬃毛 (開頭驚會整痛 Kelly, 但原來佢無咩反應),跟住左腳踏上腳踏後便一躍而上,然後右腳跨過馬身踏上腳踏後便可安全上馬。


今次 tour 約有 10 人參加,當中除左 2 個團友擁有多次騎馬經驗外,其他的都是初哥,所以今次會有兩位教練同行一個帶頭一個跟尾。上馬後,教練便開始講解注意事項。如馬匹突然奔跑,千萬不要大叫,因為這樣馬匹會仲驚而繼續狂奔,盡量要扯高馬匹的疆繩阻止牠繼續奔跑,而教練會盡快過嚟幫你。另外,只要雙腳輕輕拍打馬身即代表叫馬匹向前行,如果想向左或向右行,只需把疆繩拉向左或右邊即可。如果想馬匹跳躍,可一邊用雙腳拍打馬身,一邊叫 "Hop ..... Hop ..... Hop ......" 便可。講解完畢後,便開始嘗試自己控制馬匹走出圍欄,之後要排隊等埋其他團友便可出發進入森林探險! Let's Go !!!!!


老公仔同這 2 位有多次騎馬經驗的團友排在第一排,好叻喎!!! 一陣間你就知驚!!!

由於馬匹長期受過訓練,所以一開始會有秩序地跟住前面的馬匹慢慢行,但漸漸我同老公仔的距離就越拉越遠,點解呢? 因為 Sally 好活躍好興奮,經常與另外 2 位有多次騎馬經驗團友的馬匹一齊奔跑,搞到教練經常幫手截住 Sally。而我的馬匹 Kelly 就超級為食,一見到新鮮的綠草便跑去草叢食草,搞到我經常同佢鬥力扯高疆繩唔俾佢繼續食,要跟大隊繼續向前行。

今次 tour 主要是穿越樹林同溪澗,所行的路大部份都好平坦,但當中也有上落斜波同行泥漿路,都幾好玩。不過最刺激都係我地在好無心理準備下馬匹突然慢跑,雖然係慢跑,但對於毫無經驗的我們來說已經好好玩好刺激。最搞笑的是前面團友不斷叫 Hop Hop Hop,但她的馬匹無反應,反而 Kelly 就經常聽佢指示慢跑,真係嚇死我。


行左大約半個鐘有個小休息先可同老公仔影相,因為我地頭先真係天各一方。


Kelly 實在太唔聽話喇,經常要教練出手幫忙。



DSC_0406 (20)
休息過後便繼續行,之後到左溪澗後便開始回程。


Kelly 除左狂食草外,到了溪澗都要停一陣飲水,搞到阻塞交通。



溪澗小休時,教練好細心地安排我地一齊影相。


究竟馬匹開唔開心呢? 




回程時的倒影! 差唔多到喇! Kelly 加油呀! 辛苦你俾左我兩個鐘呀! 錫曬你!!!


話咁快兩個鐘頭的騎馬 tour 就結束喇,開頭擔心第一次騎馬會控制唔到隻馬會好危險,但最後我地的擔心是多餘的,整個 tour 都好好玩好安全。原本諗住繼續可以開開心心地開始北上黃金海岸,點之惡夢而家先至開始 ...... 我地上車後便諗住 set GPS 去今晚住的 Coffs Harbour Motel 地址,點之 GPS 點開都無反應,於是便攞落嚟睇吓先發現接駁叉電的 USB 插頭甩左,整個插頭插在 GPS 內,與連接車插的接駁位分開左,所以叉唔到電開唔到 GPS。於是我地便落車問 Glenworth Valley 職員借膠紙黐住頂住檔先,但要好大力按實 USB 的接駁位先可通電,仲要時得時唔得,十分徬徨。

點算好呢? 而家只得兩條路選擇,一係番悉尼市中心換,一係繼續向前行。但我地根本無得揀一定要番悉尼市中心換,因為無左 GPS 根本無可能向前走,唯有跟住 Sydney 路牌走回頭路啦,但又擔心去到市中心都搵唔到 Hertz 的分店。不過都唔擔心得咁多,開車先算啦。於是老公仔負責睇住 Sydney 路牌揸車,已我就 call Hertz 的 road assistance hotline 睇吓可唔以可以幫到手,點之 Hertz 的職員話 GPS 一定要番分店換,於是幫我接駁去悉尼市心的分店查詢,後來市中心的職員告訴我可以去機場嗰間分店換,一來去機場條路會易搵 d,二來機場會收夜 d,於是我地便沿途睇實 Sydney Airport 路牌好擔心地一步一步向機場邁進,好彩由 Glenworth Valley 去 Sydney Airport 是一條大直條,而且沿途的路牌指示清淅,最終揸左個半鐘頭車 (即擔心了個半鐘頭) 到達 Sydney Int'l Airport,咁頭先打左 HK$140 的漫遊都無白費,又係時候感謝主的眷顧。



其實當日取車時已覺得車插的 USB 位鬆鬆地,但都無為以要更換。經過今次教訓,下次取車時除驗查車身同性能外,GPS 都要認真檢查一番,因為 GPS 在整個自駕遊中擔當非常重要的角式。

 
去到 Sydney Int'l Airport 的 Hertz 還車處泊好車後便直奔 Hertz 的分店換個車插,點之職員死都話我地大力扯爛,同佢拗左一陣都要罰我地 A$15。算啦! 錢解決到嘅問題就唔係問題,我地仲要趕路唔想再浪費時間再拗落去。換左車插後已經 3:30 了,我地快速地喺機場食左個又貴又難食的麥記 (叫左個 Angus Beef Burger set 已經算是中等價錢 (約 A$9),但塊牛扒又 un 又乾,難食到連相都無心機影) 便開始趕路去 Coffs Harbour。


由悉尼揸上 Coffs Harbour 大約 530 公里,為了應付長途的車程,臨出發前要入定油先。(澳洲入油是要自己動手的,入完油後到 counter 講入油處的號碼便可付款)



求神拜佛 GPS 要生生性性唔好再有事喇!

 
開始離開悉尼市中心已經 4 點幾,可能撞著放工時間開始塞車,到離開悉尼上 Pacific Highway 時已開始入黑了。Pacific Highway 不是整條公路都有街燈,有時要靠車頭燈反射在公路上的反光膠才可照明,而且公路上隨時有小動物衝出來,一不留神隨時會有意外。初初公路上都有好多車結伴同行都無咁驚,但當我們越行越遠時,公路上的私家車數目就越來越少,反而有時會遇到柯柏文的大貨車同行會安心 d,因為它們的車頭燈好大好光可以照遠 d 睇遠 d。公路上都有多個休息站同 motel,當老公仔揸到倦時就會駛入去休息吓。


揸左 3 個鐘頭車喺時候休息吓順便食 dinner

 

這個休息站除左有油站外 ......

 

仲有便利店同食肆 ......



Food Court 內連埋我地只得小貓三四隻



老公仔揀左炸雞薯條 (A$9.95, 又係炸 ......)



而我唔想再炸落去,所以 order 了一份肉醬意粉配蒜蓉包 (A$9.95)




臨出發前到便利店買左兩枝咖啡提提神 (A$7 兩枝)
 
食飽後繼續北上 Coffs Harbour,終於捱多 3 個鐘車程後便達 Numbucca Heads。



輪到 Carmy 要食飽飽喇,今次等我餵飽佢啦。


入完油後,我地 set GPS 搵吓 Numbucca Heads 的 motel 留宿一晚,因為老公仔已經連續揸左六個鐘頭車都已經好倦,無謂勉強揸到 Coffs Harbour (好彩事前沒有在香港 book 定 Coffs Harbour Motel,諗住老公仔揸到倦先在附近找 motel)。沿住公路兩旁都有好多 motel,於是揀左一間諗住入去租房住,只可惜一入去見 reception 鎖了門又無人便搵嗰第二間 (雖然門口貼左話可以按鐘,但廢事擾人清夢啦),點之去左第二間的 The Numbucca Motel 都係咁,但門口貼左紙仔話想租房可以打電話查詢,於是試吓打電話但接左又無人聽,諗住走之際,突然 reception 著燈同有一個穿住睡袍的女人走出嚟問我地是否租房。付了房租 (A$89) 後便揸埋架車泊喺房間出面,落車時抬頭一看是漫天星星,星星的數目好多 (仲多過馬爾代夫)、好閃同好大粒,感覺同星星距離好近,真係超靚超開心,已把今日的辛勞通通忘記!


房間都幾大,不過一入到去感覺周身痕,唔係好乾淨!



而且廁所仲有一陣宿味,我諗好耐無人住過!


雖然老公仔話揸左 6 個鐘頭車都好辛苦,但佢話都好開心可以體驗到外國人經常為了趕路要住 motel 的經驗。點都好啦,今日真係辛苦曬,早 d 沖涼瞓覺啦! 

沒有留言:

張貼留言