2010 年北海道自駕遊 - Day 7 (札幌 JR Tower、Esta、西武百貨、狸小路、Stellar Place & Rera 千歲 Outlet)

日期：2010 年 8 月 7 日 (陰天)

今天係旅程最後一天，我地於下午 6 時就要搭飛機去東京再轉飛香港！食過酒店的早餐，就番房執行李同點算手信，你睇吓我地買左幾多嘢！

但經點算後都係唔夠，一陣間要再到狸小路掃貨，大出血喇 ...... 

執好行李，就 Check-out 及存放行李在酒店的 Reception。跟住就逛吓札幌的大型商場及百貨公司如 JR Tower、Esta、西武百貨等等，睇吓有無收獲，點知只買了一枝北海道限定的夕張蜜瓜汽水及一袋超甜蕃茄。

去旅行會捨得洗錢，連 600 Yen 嘅蕃茄都捨得買，不過真係好甜，值門票價啦！

接著再到狸小路買手信，lucky 的我們剛巧遇到每逢 8 月第一個星期六舉行的狸八德例大祭，這個祭典嘅目的是要守護狸小路的商店生意興隆。

原來祭典有很多小朋友參與的，加油，加油！ 

整個祭典又打鑼又打鼓，真的很熱鬧！

而參與祭典的大朋友都穿著印有「狸」字的裝束，很有氣氛哦！

差不多要醫肚喇，起初諗住去二条市場食蟹 (行到狸小路 1 丁目的盡頭就見到喇)，但由於依幾日都食蟹有 D 悶悶地，加上老公仔又想食烏冬，所以最終都無去到，唯有影相留念啦！

還掂冬天都會再嚟札幌睇雪祭，到時再嚟食餐勁嘅！

我地今次午餐超大食，首先到 Stellar Place 六樓的「根室花まる」報名等位，這是北海道超有名的迴轉壽司店，經常大排長龍，之後就到隔離食老公仔至愛的烏冬。

這是老公仔的 set lunch，有一碗湯烏冬同吉列豬扒飯，但係佢話唔好食，烏冬同我地上次喺大板食嗰 D 爭好遠，非常失望！

反而我依個天婦羅冷烏冬加蕎麥麵幾好食，不過都係大板好食 D。

食完烏冬後，唔駛等好耐就食迴轉壽司喇，策略成功，Yeah！

連店內的杯都係迴轉架！

壽司好大件好新鮮，價錢又合理，唔怪得咁多人等啦！

由於之前食左烏冬，今次的成績麻麻地！

醫飽肚後要番酒店攞行李去機場喇，我地辦妥 Check-in 及寄存行李的手續後還有一小時多才可入閘，便決定搭機場的 shuttle bus 去 Rera 千歲 Outlet。Shuttle Bus 每半個鐘一班，lucky 的我倆一到巴士站就有車。喺巴士見到 Outlet 廣告，先知 8 月 6 日開始再有優惠，唔知我地買唔買到嘢呢?

大約十分鐘車程就到達 Rera 千歲 Outlet，由於要趕下一班 shuttle bus 回機場，我地只有半個鐘時間，第一站就去 Adidas 同 Nike 專門店，但係無收獲。跟住再到 Levis 睇牛仔褲，老公仔見有 D 減價貨品比香港還要平，千挑萬選下揀到一條啱心水的牛仔褲，連改褲腳費用約為港幣 300 元多，真係幾抵！我地襯改褲的時間再逛多幾間商店如 Timberland、Edwin、LEGO 等都係無收獲！

好彩最終都有收獲，唔係就白行一趟喇！

最後搭番 shuttle bus 回新千歲機場，轉機到東京再飛香港，7 天的北海道之旅話咁快就結束喇，真係有 D 唔捨得！ 

這是從飛機拍到的東京夜景，係唔係好靚呢? 唔知被譽為世界三大夜景之一的函館夜景會唔會仲靚呢? 下次嚟北海道一定要去函館見識一下。

我地覺得北海道係一個很棒的地方，四季都有不同的特色，春天可觀賞櫻花、夏天可欣賞花田、秋天有紅葉而冬天則有當地特色的雪祭，我地已經計劃冬天會重臨北海道，你呢?