四圍走的足跡: 2011 馬爾代夫自由行 - Day 3 - Part 1 (Constance Moofushi Resort

日期：2011 年 6 月 27 日 (晴天)

今早約於 7 點就起身梳洗，因為 9:30 要參加出海浮潛 tour。一起身第一時間睇吓出面有無落雨，事關琴晚 check 天文台話今天馬里市會有雨，雖然 Resort 遠離市中心，但我地都好擔心 tour 會因天氣而取消，再一次感謝主嘅恩賜。

當我想霸住嗰廁所時，突然間見到老公仔好迅速地由露台跑入房找相機，佢話見到 Baby Shark，我即刻好興奮地跑出露台，果然有一條 Baby Shark 係我眼前出現，只可惜佢游得太快，我仲未影到佢就已經游左去對面嘅 Villa，非常失望。本來諗住落樓梯走落海找尋佢嘅蹤影，但係水流比較急有 d 危險。不過我無因為咁已放棄，希望可以守株待兔等佢出現，所以叫老公仔用廁所先。果然皇天不負有心人，佢再次游近我地間 Villa，今次終於偷拍成功喇！ Yeah！

辛苦影番嚟嘅相係特別珍貴的！

梳洗完畢後，臨出門口前喺床頭放低 $1 美金 (執房 tips)，然後就攞埋浮潛工具 (救生衣、mask & fins) 同防水相機出發去食早餐喇，可能時間尚早，今次可以坐室外對住海灘食早餐。

一定要試呢度 d 果汁，真係好 fresh，我通常都要 encore。

由於一陣間要玩浮潛，食得太飽都不適宜。

不過我最愛嘅奄列就不能放過，哈哈！

食完早餐都差唔多 9:20，喺時候行去 Manta Bar 隔離嘅 Diving Center 集合，基本上 Diving Center 係所有 tour 嘅集合地方。我地去到時見唔到其他團友，心諗可能係時間尚早啦，點之 9:30 教練嚟到就話出發，原來今日只得我地兩個 join 左出海浮潛，咁我地豈不是包團，「正」！

唔知一陣間見唔見到 mo 仔呢?

首先，教練會 check 吓我地 d 浮潛工具齊唔齊，跟住就可以上船喇，船上已經有 2 個酒店職員等我地，酒店職員主要負責開船同 serve 我地 (如幫我地攞水同毛巾等等)。

很高興太陽伯伯能一同參與今次嘅 tour，thanks for coming!!!

開船後，教練首先問我地游水 ok 嗎? (其實依個 tour 係 for d 識游水嘅遊客參加，但一場嚟到馬爾代夫就算唔識游水都要體驗吓)，於是我就同佢講我唔識游水但曾經玩過浮潛，教練話一陣間只要跟足佢嘅指示應該無問題！之後教練就講吓要注意嘅事項，例如不可擅自離隊；不可破壞海洋生物 (特別係脆弱的珊瑚)；如果唔舒服就即刻浮上水面，佢會盡快嚟幫我地；由於我唔識游水，教練要求我握住過浮標，浮標末端有一條長長嘅蠅方便教練拉住我，真係失禮曬！

今日嘅 tour 共去 2 個浮潛地方，開船約 15 分鐘後，終於到達第一個浮潛勝地。船停定後，我地準備好一切便出發。但臨出發前，我地問教練如果遇到鯊魚應該怎麼辦，教練笑住答我地呢度 d 鯊魚唔會襲擊人類，因為海洋已有豐富資源供牠們享用，叫我地唔駛擔心，於是喺半信半疑嘅情況下終於出發喇！